مش لازم كل حاجة يكونلها عنوان عشان العنوان بيختلف من كل قارئ و التاني..كل واحد يحط العنوان الي يعجبه

أول حاجة سلام

اخيرا قررت اني هبطل كتابة شوية, مش على طول لكن انا محتاجة اصفي ذهني و اطلع من جو الكلام و الاشياء الحلوة من بره لكن فاضية من جوه. انا مرت عليا فترة فقدت القدرة على الكتابة و فقدت الاستمتاع و كنت بكتب لمجرد الاحساس بالالتزام تجاه الكتابة نفسها...يعني لو كتبت حاحة و حد قراها ده معناه اني لازم اكتب تاني و بسرعة..ليه معرفش. و بدل ما اكون انا الي بملك الكلام في ايدي اصبحت انا اسيرة للكلام و الاسير صحيح بينفذ لكن من غير رضا و من غير استمتاع و من غير احساس. يمكن انا بكبر و لازم اغير نظرتي للحاجات شوية..الي كان بيبسطني زمان معادش بيبسطني...انا محتاجة فترة كده من غير ابداع و من غير احداث, فترة انتقال..اكبر و اتنفس و اتغير و يمكن لو رجعت اكتب تاني ارجع اكتب احسن من الاول و اكتب عن حاجات لها معنى و قيمة حقيقية. انا ندمانه على كل مجهود بذلته كان ممكن يتوجه لحاجة افضل و اقيم. و كمان مش عايزة اكتب شعر...عايزه اكتب كلام حقيقي..تقول بقى خواطر تقول نثر مش عارفة اسميه ايه بس لما اتعلم اكتر هحدد نوع الكتابة الي هركز عليها. انا اسفة اني طولت و اسفة اني بكتب كلام شخصي ممكن ميعنيش و ميهمش حد, بس يمكن انا بجد مقدرش اعيش من غير ما اكتب و لو مكتبتش شعر هتحجج باي حاجة و هكتب عن اي حاجة تانية

وا خيرا سلام

ملحوظة: على فكرة البوم منير جامد اخر حاجة, الي لسه مسمعوش يسمعو عشان مهما كان ذوقك اكيد هتلاقي الي تحبه